കോഴിക്കോട്: “ബീ ദ ബീയിംഗ്, ബിയോണ്ട് ദ കംഫോർട്ടബിൾ” (Be the Being, Beyond the Comfortable) എന്ന പ്രമേയത്തിൽ നടക്കുന്ന പതിനെട്ടാമത് പ്രൊഫ്സമ്മിറ്റിന് കുറ്റ്യാടി സിറാജുൽ ഹുദാ കാമ്പസിൽ തുടക്കമായി. മൂന്ന് ദിവസങ്ങളിലായി നടക്കുന്ന റസിഡൻഷ്യൽ കോൺഫറൻസിൽ വിവിധ പ്രൊഫഷണൽ കോളേജുകളിൽ നിന്ന് തിരഞ്ഞെടുക്കപ്പെട്ട രണ്ടായിരത്തിലധികം പ്രതിനിധികളാണ് പങ്കെടുക്കുന്നത്.
അക്കാദമിക് മികവിനൊപ്പം സാമൂഹികപ്രതിബദ്ധതയും ധാർമികബോധവുമുള്ള പ്രൊഫഷണൽ തലമുറയെ വാർത്തെടുക്കുക എന്നതാണ് സമ്മിറ്റിന്റെ പ്രധാന ലക്ഷ്യം.സ്വാഗതസംഘം ചെയർമാൻ സയ്യിദ് ഹുസൈൻ തങ്ങൾ പതാക ഉയർത്തി. എസ് എസ് എഫ് സംസ്ഥാന പ്രസിഡണ്ട് സയ്യിദ് മുനീർ അഹ്ദൽ അഹ്‌സനി പ്രാർഥനക്ക് നേതൃത്വം നൽകി.
ഇന്ന് രാവിലെ ഐ ഐ എം കോഴിക്കോട് ഡിസിഷൻ സയൻസസ് & ഓപ്പറേഷൻസ് മാനേജ്‌മെന്റ് വിഭാഗം പ്രൊഫസർ ഡോ. രൂപേഷ് കുമാർ പതി പ്രൊഫ്സമ്മിറ്റ് ഉദ്ഘാടനം ചെയ്യും. സുൽത്താനുൽ ഉലമ കാന്തപുരം എ പി അബൂബക്കർ മുസ്‌ലിയാർ മുഖ്യാതിഥിയാകും. സയ്യിദ് ഖലീൽ ബുഖാരി, പേരോട് അബ്ദുറഹ്മാൻ സഖാഫി, ഡോ. അബ്ദുൽ ഹകീം അസ്‌ഹരി, സയ്യിദ് മുനീർ അഹ്ദൽ, ഡോ. ടി അബൂബക്കർ വിവിധ സെഷനുകളിൽ സംബന്ധിക്കും.
ദേശീയ-അന്തർദേശീയ തലങ്ങളിൽ നിന്നുള്ള 150-ലധികം വിദഗ്ധർ നയിക്കുന്ന 75 അക്കാദമിക്-ടെക്നിക്കൽ സെഷനുകളും ആശയവിനിമയത്തിനായി 10-ലധികം പ്രത്യേക ലോഞ്ചുകളും സജ്ജീകരിച്ചിട്ടുണ്ട്. നൈപുണ്യ വികസനം, ഐഡിയേഷൻ റൗണ്ടുകൾ, പ്രൊഫഷണൽ എത്തിക്സ്, കരിയർ-ലീഡർഷിപ്പ് പരിശീലനങ്ങൾ എന്നിവ സമ്മേളനത്തിന്റെ ഭാഗമായി നടക്കും. കോൺഫറൻസ് ഞായറാഴ്ച സമാപിക്കും.
